المكان:-

غرفة المعيشة بجوار الدفاية
اللهب المقدس يذيب بعض النخاع في عظامنا الباردة

الأحداث:-

ماما قاعدة على أعصابها في انتظار ايناس - اختي - عشان تقوللها عملت ايه في الامتحان
أنا قاعد في تعاسة بحاول افهم ازاي المجال المغنطيسي بيطلع من محور الملف اللولبي

- أيمن
- أيوة يا ماما
- أختك مجتش لحد دلوقتي
- ياماما الساعة ستة..هيا كان امتحانها امتى؟
- اتناشر ونص..ساعة إلا ربع بس
- هيا مادة ايه
- كميا مش عارفة ايه كده
- Pharmacutical chimstry?
- أيوة
- يبقى الضّوي عمل حركته
ولمن لا يعرف الضوي فهو آت في السكة
المهم..
كملنا اللي كنا بنعمله - مكناش بنعمل حاجة أصلا-
لغاية ما جرس الباب ضرب
- أختكو يا ولاد
- ولاد ايه..انا واحد بس
- روح رد عالباب
المهم..رحت ارد عالباب
- أيوا؟
- افتح يا أيمن
- كلمة السر؟
- افتح بأه
فانا شميت ريحة شيل في الموضوع
فماما بتقابلها عالسلم:-
- خير يا بنتي؟
- شر..
- عملتي ايه
بصتلنا بصة ذاهلة وقالت في ضياع كلمة مطمئنة للغاية:-
- معملتش!!!!
ثم استطردت في شراسة في طريقها للأوضة:-
" ربنا عالضّوي..ربنا عالضّوي..ربنا عالضّوي..ربنا عالضّوي..ربنا عالضّوي..ربنا عالضّوي..ربنا عالضّوي............ "
ماما اكتأبت وانا كملت مذاكرة..المهم
------------ ---
والكلية هي كلية الصيدلة بطنطا
والمادة كما قلنا هيا الكميا الصيدلية
والدكتور هوا محمد عبفتاح الضوي
والسنة هي السنة الثالثة..وهيا بعبع السنوات الخمس
فياعيني ايناس رجعت من المتحان نامت في صمت وبالليل قامت تذاكر
المهم..انا كنت فاضي قلت استدرجها في الكلام اعرف حصل ايه..
- هوا نتي عملتي ايه في الامتحان؟
-معملتش يابني..
ثم بدأت وصلة ربنا عالضّوي..وبعد الانتهاء
- انتا مش هتتخيل حصل ايه النهاردة
- يا ستي..ايه اللي هيحصل يعني
- رحنا الساعة اتناشر ونص نمتحن
- تمام
- ملقيناش الامتحان
- نعم!!!
- زي مبقوللك كده..قعدنا مستنيين لحد الساعة وحدة..وبعدين طلعوا يسألو الضوي الهي يقطعه لقوه لسا بيحط الامتحان
- لسة بيحط ايه بسلامته؟
- الامتحاااااااان
- طب وده بيتحط في وقت مالطلبة بتمتحن
- طول عمرك حمار..منتش فاهم..اصل ده الضوي..لم كل ورق الكورسات وشاف الحاجات اللي مكتوب عليها مهم وراح عامل امتحان جديد في الحاجات اللي مكتوب سيبك منها
- يخرم جيبه
- لأ وإيه..قعد يحط فيه ساعتين..وعلى ماوداه المطبعة واتطبع بأه
- خد وقت
- متعدش..وانطبع على ورقتين مفعصين فبعضهم مشفناش منهم ولا كلمة..آل ايه مفيش ورق
- مهزلة..روحي للوزير
- وزير ايه يابا..المهم مكملتلكش
- هوا لسة فيه حاجة تاني؟
- ماحنا لم اخدنا الورق كانت الساعة اربعة...والمتحان ساعة الا ربع
- وبعدين
- لقينا غلطات كتير..يعني مثلا مكتوب في الرسمة المقابلة..ومفيش رسمة مقابلة..
- طب وعملتي ايه
- حليت منغير رسمة!!!!!
- طب مسألتيش الضوي ليه؟
- وده حد يستجري يسأله..هوا صحيح أزعة بس مفتري
- وبسلامته كان في اللجنة؟
- آه...ماهو المراقبين كانو مشيو..وهوا قاللنا "انا همشي وسط اللجنة عشان أشوف رد الفعل واشوف بتحلو ازاي"
- وانتو حليتو حاجة؟
- ربنا المعين..بس التبليم كان على الوجوه ظاهرا
- أعوذ بالله
- لسا التقيل جاي ورا..سيبني أبع يا بني..قاللنا في محاضرة بعد الامتحان عشان نشوف المادة جاية ازاي
- الله؟ امال انتو كنتو بتمتحنو ايه
- دا منهج إضافي..عليه عشرين درجة..ومن العملي منه لله..يعني هننقصلنا بتاع خمستاشر درجة
- منهج إضافي؟ يعني لسة ممتحنتوش المادة؟
- لأ..وقاللنا عالمحاضرة دي واحنا فقمة الانهيار
- تلاقيه هيرأف بيكو في التصحيح
- معلش يباني انتا لسة برضه صغير متعرف الضوي
- طيب..وحصل ايه في أم المحاضرة دي؟
- بعد ماخدنا على دماغنا في الامتحان رحنا المحاضرة دي..وكتبناله لأسئلة اللي عايزينها في ورق..
- وحصل ايه
- خد عندك..واحدة بتسأله هوا توزيع الدرجات بين منهج حضرتك ومنهج دكتور طاهر كام؟
بسلامته اتنرفز جدا..وزعق وقال:- مفيش حاجة علمية اسمها منهج ومنهج..انتو تذاكرو بس..وتجاوبو..وتحلو اللي احطو"
- يا ساتر
- لأ والصدف المنيلة ان في واحد تاني سأل نفس السؤال في ورقة تانية..فشتمنا..قاللنا" It's not your damn business"
- !!!
- آه..وكان كل مايجيله سؤال يدخل في استركشرات كتير كده وميطلعناش بعقاد نافع
- منه لله
- انتا عارف؟ فمرة كان فيه شوية طلبة من العيال الدحيحة اللي بيقعدو في البنش الأول راحو يسألوه في الأوضة بتاعته
- وانتي ايه علاقتك بالعالم الامواس دول؟ انتي يادوبك الجيد المنخفض
- احترم نفسك..انا صاحبيتي الأولى عالدفعة..المهم..راحو وخبطو ودخلو يسألوه..قاللهم في تانحة:- مش في عامل بره؟ تقولوله يدخل يستأذنني الأول قبل ماتدخلو. هيا سويقة
فالعيال اتحرجت وطلعت برا والعامل دخل وطلع
- ايه قاللهم متدخلوش؟
- لأ دخلهم..بس لما سألوه قاللهم:- "والله الكلام ده عندكو في المحاضرات اللي فاتت..ذاكرو شوية...بره"
- دا جزاء اللي يذاكر
- ربنا يستر عالامتحان الجاي..يارب مدخلوش في الشفوي
- انتي تهربي احسن
- وبسلامته عامللي الدكتور الرستيج..واحد يعدلله الكرسي..واحد يمسحله الوايت بورد..واحد يفتحله اللاب توب
- دا أنتيكة أوي
-إوعي ياني تدخل صيدلة..انا بريئة من دمك
وزي مانتو شايفين يا مشفاكرين طلعت ايناس غلطانة في حق الراجل السكرة ده..
يسقط الطلبة ويحيا الدكاترة